सच्चा गायिका अडेल

विश्व संगीतमा ग्ल्यामर र चमकधमकको पनि विशेष स्थान छ । संगीतकर्मीहरू आफूलाई आकर्षक देखाउन अनेक हर्कत गरिहिँड्छन् । माइली साइरस, लेडी गागा, निकी मिनाज, जस्टिन बिबरजस्ता गायकगायिकाहरू तालतालका क्रियाकलाप गर्दै आफूलाई अरूभन्दा अलग देखाउन तम्सिन्छन् । यिनै विचित्रका संगीतकर्मीहरूमाझ सन् २००८ मा अडेल एडकन्स भन्ने नाम सुन्नमा आयो । बेलायतकी यी गायिका अरूले जस्तो नानाभाँती गरेर चर्चामा आएकी थिइनन् । ‘चेजिङ पेभमेन्ट…’, ‘कोल्ड सोल्जर…’ जस्ता गीतले अडेललाई ख्याति दिलाए । रूपरङ र तडकभडकको सट्टा उनले गायनमार्फत दर्शक–श्रोताको मन जितेकी थिइन् ।

त्यसयताका दिनमा ‘लेट द स्काइफल…’, ‘रोलिङ इन द डिप…’, ‘समवान लाइक यु…’, ‘हेलो इट्स मी…’ जस्ता स्तरीय गीत बाहिर ल्याइसकेकी छन् । स्लिम एन्ड ट्रिम जीउ–ज्यानको जमानामा उनले आफूलाई मोटीको मोटी नै राखेकी छन् । गीतमा असभ्य शब्द प्रयोग गर्दिनन् । सन् २०११ मा ओस्कार अवार्ड जितेकी उनलाई ‘सच्चा गायिका’ को रूपमा सम्मान गरिन्छ ।
अडेलको वास्तविक नाम अडेल अउरी ब्लु एडकन्स हो । एकल आमाकी सन्तान उनी स्पाइस गर्ल र इला फिट्जराल्डका गीत सुन्दै हुर्किएकी थिइन् । उनको खानदानमा कोही पनि संगीत पृष्ठभूमिका छैनन् । सन् १९८८ मा जन्मिएकी उनले १६ वर्षको छँदा ‘होमटाउन ग्लोरी…’ बोलको गीत लेखेकी थिइन् । यसलाई धेरैले मन पराए । फोर्ब म्यागाजिनले निकालेको सूचीमा उनी सन् २०१२ मा सबैभन्दा बढी पारिश्रमिक दिइने सेलिब्रिटीको छैटौं नम्बरमा परेकी थिइन् । अडेलका नाममा तीनवटा विश्व कीर्तिमानी दर्ता भएका छन् । लिओना लिवास र जेसी जे उनका स्कुलका साथी थिए । दुवै अहिलेका चर्चित गायिका हुन् ।

एक छोराकी आमा, अडेल हप्तामा पाँचवटा फिल्म अनिवार्य हेर्छिन् । बरु, आफ्नै गीत त्यति सुन्दिनन् । उनी किटाणुदेखि औधि डराउँछिन् । रुघाखोकी लागेका मान्छेसँग हात मिलाउन मान्दिनन् । किटाणु सर्ला भन्ने ठूलो पीर पर्छ रे । घाँटी दुखेका बेला उनी गाउन सक्दिनन् । पाककलामा उनको राम्रो दक्षता छ । गीत गाउनतिर नलागेको भए आफू म्युजिक टिचर भएर जिन्दगी कटाइरहेको हुने उनी बताउँछिन् । शिक्षणलाई उनी महत्त्वपूर्ण पेसामा मान्छिन् र कुनै दिन गायन छोड्नुपरे शिक्षणतिरै लाग्ने उनको सोचाइ छ । पति सिमोन कोनेकीलाई समेत आफ्नै नामले ख्याति दिलाएकी अडेलले छोराको नाम भने लामो समय गोप्य राखेकी थिइन् । एन्जेलो लेखिएको नेकलेस लाएपछि मात्रै उनको छोराको नाम अरूले थाहा पाए ।

उनले पछिल्लोपटक निकालेको ‘हेलो…’ गीत औधि लोकप्रिय भयो । कोरियन गायक साइको ‘गङनम स्टायल…’ ले युटयुबमा १ सय ५८ दिनमा हासिल गरेको भ्युज ‘हेलो…’ले ८७ दिनमै प्राप्त गरेको थियो । आइटयुन्स सिंगल चार्टमा यो सिधै नम्बर एकमा पुगेको थियो । अडेलले चार महिना लगाएर ‘हेलो…’ को शब्द रचना गरेकी थिइन् ।

  • New title for a=>html, img=>alt
  • New title for a=>html, img=>alt
  • New title for a=>html, img=>alt
  • New title for a=>html, img=>alt
  • © 2017 Kalakhabar. All Rights Reserved...